المقدمة
طريقة سهلة واقتصادية جدا لعمل المولتو او الكرواسون في البيت الحجم الصغير ومحشوة بالشوكولاتة او بالعجوة بكميات وبوفرة كبيرة 48 قطعة تنفع للعزومات في رمضان.
مكونات عجينة المولتو
- 5 كوبيات دقيق كبار
- معلقة صغيرة بيكنج بودر
- نص معلقة ملح
- معلقتين سكر
- ظرف فانيليا
- ظرف او معلقة خميرة فورية
- نص كوباية زيت
- معلقة خل كبيرة
- كوباية مايه دافية
- كوباية حليب دافيء ( اذا متوفر )
مكونات وادوات جانبية هنحتاجها
- نشا ودقيق
- طبق زبدة او سمنة للدهان
- مكعبات شيكولاتة للحشو
- بيضة واحدة
- معلقتين من الحليب
- صينية فرد العجين
- صينية الفرن
- النشابة لفرد العجين او يدويا
- ظرف فانيليا
- معلقة زيت ندهن صينية الفرن منه
خطوات أو طريقة عمل عجينة المولتو بالتفاصيل
- هنضيف الخميرة والسكر والزيت والفانيليا وكوباية المايه والحليب والخل وهنقلب المكونات دي مع بعض كويس لحد ما تلاقيها دابت معانا.
- بعدها نحط الدقيق والملح والبيكنج بودر ونقلب كله مع بعض.
- ونعجن كويس العجينة لحد ما تمسك معاكي ونغطيها ونسيبها في مكان دفيء لمدة نص ساعة لحد ما تخمر.
- هناخد العجينة نجمعها ونلمها بعد ما خمرت.
- هنجيب صينية نرشها بشوية دقيق ونقطع العجينة كور متساوية 15 قطعة ونرصهم جمب بعض ونغطيهم ونسيبهم تاني 10 دقايق عشان يبقى سهل علينا نفردها بعد كدا.
- هنجيب صينية كبيرة اللي هنخبز عليها ونرش شوية دقيق قبل ما نبدأ عشان ماتلزقش فالعجين.
- هنفرد كل 15 قطعة اللي كورناهم بشكل دائري متساوي ونرصهم فوق بعض ونرش شوية نشا فوق كل طبقة.
- هناخد منهم 5 طبقات بس ونسيح الزبدة ندهنها فوق كل طبقة مع رشة نشا وهنضغط على الطبقات ونفردهم اكتر.
- هنجيب السكينة ونقطع العجينة اربع تربع ونقسم كل ربع نصين هيطلع معاكي 16 قطعة على شكل مثلثات.
- هنحشي اول مثلث بمكعب الشيكولاتة وهنلف من برا لجوة ونشد العجين شوية بحيث تبرم حوليها وهكذا.
- هنرصهم في صينية الفرن تكون مدهونة بالزيت ومهم جدا يكون بينهم مسافات.
- هنجيب طبق صغير نخلط فيه معلقتين حليب وبيضة ونقطتين خل ونقلبهم بعدها ندهن وش المولتو اللي رصناهم.
- هنسيبهم نص ساعة لحد ما يخمر وحجمه هيضاعف اكتر.
- نسيب الفرن شغال ياخد سخونة فالاول لازم يكون جاهز قبل ما ندخل الصينية.
- هنخبزه فالفرن لمدة عشر دقايق على درجة حرارة 200 درجة مئوية لحد ما يستوي ولونه يبقى ذهبي من فوق ومن تحت.
- بعد ما يخرج هتغطيه بحتة قماش يهدا شوية.
